حکومت کی جانب سے گندم کی درآمد کے معاملے پر بہتر رابطہ کاری کی ہدایت

حکومت نے وفاقی اور صوبائی حکام کو گندم کی درآمد کے معاملات میں بہتر رابطہ کاری اور ضرورت کے مطابق طریقہ کار کو مؤثر بنانے کی ہدایت دی ہے۔ میٹِس گلوبل کے مطابق مقصد تمام صوبوں میں گندم کی دستیابی اور قیمتوں کا استحکام برقرار رکھنا ہے، جس کے لیے غذائی تحفظ کے اقدامات اور تقسیم کے بہتر انتظامات پر زور دیا گیا۔

نائب وزیر اعظم اور وزیر خارجہ سینیٹر محمد اسحاق ڈار کی زیر صدارت اعلیٰ سطح کے اجلاس میں گندم کے ملکی ذخائر، متوقع طلب اور رسد کے نظام کا جائزہ لیا گیا۔ اجلاس میں وفاقی وزیر برائے قومی غذائی تحفظ و تحقیق، سندھ کے وزیر خوراک، متعلقہ وزارتوں کے حکام اور صوبوں، آزاد جموں و کشمیر اور گلگت بلتستان کے نمائندے شریک ہوئے۔ کمیٹی نے ملک بھر میں رسد اور قیمتوں میں توازن اور عوام کو سہولت دینے کے اقدامات پر زور دیا۔