امبانی اور اڈانی کے ادارے مودی کے پرائیویسی قانون کو عدالت میں چیلنج کرنے والے بھارتی ناشرین میں شامل

مکیش امبانی اور گوتم اڈانی سے وابستہ اداروں سمیت 21 بھارتی خبر رساں اداروں نے سپریم کورٹ سے ملک کے نجی معلومات کے قانون کی اہم شقیں کالعدم کرنے کی درخواست کی ہے۔ بزنس ریکارڈر نے خبر رساں ادارے رائٹرز کے حوالے سے بتایا کہ 6 اکتوبر کی درخواست میں مؤقف اختیار کیا گیا ہے کہ یہ ضابطے صحافتی تحقیقات میں رکاوٹ بن سکتے ہیں اور صحافیوں کے خفیہ ذرائع ظاہر ہونے کا خطرہ پیدا کر سکتے ہیں۔

ناشرین کے مطابق رضامندی لینے اور ذاتی معلومات مٹانے کی شرائط سے خبریں ہٹانے یا تبدیل کرنے کی نوبت آ سکتی ہے، جبکہ معلومات طلب کرنے کے حکومتی اختیارات خبررساں اداروں کے ذرائع کو خطرے میں ڈال سکتے ہیں۔ متنازع شقوں کا بیشتر حصہ مئی 2027 سے نافذ ہونا ہے اور مقدمے کی سماعت منگل کو مقرر ہے۔ ناشرین کا یہ بھی کہنا ہے کہ حکومت کی جانب سے آزادی صحافت کے تحفظ کی یقین دہانی کے باوجود قانون میں صحافت کے لیے واضح استثنا موجود نہیں۔