مرکزی بینک نے پالیسی ریٹ 50 بیسس پوائنٹس بڑھا کر 12 فیصد کر دیا

اسٹیٹ بینک آف پاکستان نے پیر کو پالیسی ریٹ 50 بیسس پوائنٹس بڑھا کر 12 فیصد کردیا، جو اس سے پہلے 11.5 فیصد تھا۔ گورنر جمیل احمد کے مطابق مانیٹری پالیسی کمیٹی نے مہنگائی کے منظرنامے، عالمی تیل اور اجناس کی قیمتوں، ملکی حالات اور بیرونی کھاتے کے دباؤ کا جائزہ لیا۔

کمیٹی کے 10 میں سے 9 ارکان نے اضافے کی حمایت کی، جبکہ ایک رکن اس سے بڑا اضافہ چاہتا تھا۔ اسٹیٹ بینک نے ترسیلات زر کا تخمینہ 44 ارب ڈالر سے بڑھا کر 45 ارب ڈالر کردیا، اور گورنر نے کہا کہ برآمدات میں بہتری ہے مگر وہ معیشت کی ضرورت کے مطابق نہیں۔ ڈان کے مطابق ٹاپ لائن سیکیورٹیز نے شرح میں اضافے کو اپنی توقعات کے مطابق قرار دیا۔