گھندھارا انڈسٹریز پاکستان میں یو ڈی ٹرک فروخت کرے گی

گندھارا انڈسٹریز لمیٹڈ (GHNI) نے ایک بڑے عالمی ٹرک ساز ادارے یو ڈی ٹرکس کارپوریشن کے ساتھ اسٹریٹجک شراکت داری کی ہے، جس کے تحت پاکستان میں اس کی سی بی یو گاڑیوں کی مارکیٹنگ اور تقسیم کمپنی کے ذمے ہوگی۔ بزنس ریکارڈر کے مطابق کمپنی نے یہ پیش رفت پاکستان اسٹاک ایکسچینج کو ایک نوٹس میں بتائی۔

نوٹس کے مطابق یو ڈی ٹرکس کی گاڑیوں کی درآمد اور تقسیم کیلنڈر سال 2027 کی پہلی سہ ماہی سے شروع ہونے کی توقع ہے۔ گندھارا نے اس معاہدے کو اپنی مصنوعات کا دائرہ وسیع کرنے میں ایک اہم سنگ میل قرار دیا اور کہا کہ اس سے کمپنی کے مستقبل کے ترقیاتی امکانات کو تقویت ملے گی۔

گندھارا 1963 میں پاکستان میں قائم ہوئی اور اسوزو ٹرکس، بسوں اور پک اپس کی اسمبلی کا کام کرتی ہے۔ یو ڈی ٹرکس کارپوریشن ایک جاپانی کمپنی ہے جو ڈیزل ٹرکوں اور بسوں کے ساتھ بس چیسس اور خصوصی مقاصد کی گاڑیاں تیار اور فروخت کرتی ہے۔