حکومت نے قومی بجلی منصوبہ 2023-27 میں ترامیم کی منظوری دے دی

بزنس ریکارڈر کے مطابق کیبنٹ کمیٹی برائے توانائی نے نیشنل الیکٹریسٹی پلان 2023-27 میں ترامیم کی منظوری دے دی ہے۔ ان ترامیم میں مربوط توانائی منصوبہ بندی، بجلی کی پیداوار اور ترسیل میں توسیع، دور دراز علاقوں میں قابل تجدید بجلی اور سرحد پار بجلی کی تجارت شامل ہیں۔ وزیراعظم محمد شہباز شریف کی زیرِ صدارت اسلام آباد میں منگل کو ہونے والے اجلاس میں پاور ڈویژن نے ترامیم پیش کیں۔

اس کے علاوہ ٹیرف ڈیزائن، بجلی کی بچت، خطرات کی نشاندہی، مقامی سطح پر ایندھن اور ٹیکنالوجی کی استعداد، تحقیق و ترقی اور ڈیجیٹائزیشن بھی ترامیم کا حصہ ہیں۔ کمیٹی نے متعلقہ حکام کو ہدایت کی کہ اس بارے میں خیبر پختونخوا حکومت اور نیپرا کے ساتھ مزید مشاورت کی جائے۔ ترامیم میں سسٹم اور مارکیٹنگ آپریشنز اور انتظامی امور بھی شامل ہیں۔

اجلاس میں 2027 سے 2060 کے مربوط توانائی منصوبے کی اعلیٰ سطحی ڈیزائن رپورٹ کی منظوری بھی دی گئی۔ بیان کے مطابق اس منصوبے میں وفاقی اور صوبائی حکومتوں کے علاوہ دیگر متعلقہ فریق بھی شامل ہوں گے۔ اس منصوبے کا مقصد توانائی کا تحفظ اور معاشی مسابقت یقینی بنانا، صنعتی اور گھریلو صارفین کو مناسب نرخوں پر بجلی فراہم کرنا اور کم کاربن اخراج والے ذرائع کو فروغ دینا ہے۔ اسی اجلاس میں بجلی اور گیس کے شعبوں میں گردشی قرضے سے متعلق رپورٹس بھی پیش کی گئیں۔