فوجی فوڈز کے سی ای او عثمان ظہیر نے استعفیٰ دے دیا

فوجی فوڈز لمیٹڈ نے پاکستان اسٹاک ایکسچینج کو آگاہ کیا ہے کہ اس کے چیف ایگزیکٹو عثمان ظہیر احمد نے استعفا دے دیا ہے جو 18 ستمبر سے مؤثر ہوگا۔ بورڈ مناسب وقت پر ان کے جانشین کا تقرر کرے گا۔ یہ اطلاع پیر کو جاری کیے گئے نوٹس میں دی گئی، جیسا کہ بزنس ریکارڈر نے رپورٹ کیا۔

عثمان ظہیر احمد کمپنی کی پالیسی کے مطابق اپنی نوٹس کی مدت مکمل ہونے تک بطور چیف ایگزیکٹو فرائض انجام دیتے رہیں گے۔ کمپنی نے ان کی قابل قدر خدمات اور لگن پر ان کا شکریہ ادا کیا۔ ان کی لنکڈ ان پروفائل کے مطابق وہ مارچ 2022 سے چیف ایگزیکٹو ہیں اور فوجی گروپ کے کنزیومر کاروبار کی نگرانی کر رہے ہیں جو چار فیکٹریوں پر محیط ہے۔ اس سے پہلے وہ اپریل 2019 سے مارچ 2022 تک نشاط ستاس ڈیئری کے چیف ایگزیکٹو رہے۔

فوجی فوڈز فوجی گروپ کا حصہ ہے اور اس کی پیداوار میں ٹونڈ دودھ، ملک پاؤڈر، فروٹ جوس اور پنیر، مکھن اور نورپور کریم جیسی ویلیو ایڈڈ ڈیری مصنوعات شامل ہیں۔ فوجی فاؤنڈیشن اور فوجی فرٹیلائزر نے 2015 میں نون پاکستان لمیٹڈ کو حاصل کیا، جس کے بعد کمپنی کو موجودہ نام دیا گیا۔