جوہری بجلی کی پیداوار میں 4 فیصد اضافہ، ریکارڈ سطح پر پہنچ گئی

ڈان کی رپورٹ کے مطابق پاکستان میں جوہری بجلی کی پیداوار 2025 میں 3.7 فیصد بڑھ کر 22.5 ٹیرا واٹ آور کی نئی ریکارڈ سطح پر پہنچ گئی، جو 2024 میں 21.7 ٹیرا واٹ آور تھی۔ یہ اعداد و شمار ورلڈ نیوکلیئر انڈسٹری اسٹیٹس رپورٹ 2026 میں شامل ہیں۔ شمسی بجلی کی پیداوار اس سے کہیں تیزی سے بڑھ کر 36.3 ٹیرا واٹ آور تک پہنچ گئی اور پہلی بار جوہری پیداوار سے آگے نکل گئی، جبکہ رپورٹ کے مطابق یہ حجم اصل پیداوار سے کم ظاہر ہوا ہے۔

پاکستان میں اس وقت چھ جوہری ری ایکٹر کام کر رہے ہیں جن کی مجموعی پیداواری صلاحیت 3,262 میگا واٹ ہے، اور یہ سب چائنا نیشنل نیوکلیئر کارپوریشن نے تعمیر کیے۔ پاکستان اکنامک سروے 2025-26 کے حوالے سے رپورٹ بتاتی ہے کہ جوہری بجلی کی لاگت میں قرض کی ادائیگی کا حصہ نمایاں ہے، جو زیادہ تر کینوپ-2 اور کینوپ-3 سے منسلک ہے، جو بالترتیب 2022 اور 2023 میں فعال ہوئے۔ چشمہ میں 1,000 میگا واٹ کا ایک اور ری ایکٹر، سی-5، تعمیر کے مراحل میں ہے جسے 2030 تک مکمل ہونے کی توقع ہے۔

رپورٹ کے مطابق 2017 کے آغاز سے 2026 کے وسط تک پاکستان نے چین سے 58 گیگا واٹ سے زائد شمسی پینل درآمد کیے، جن میں سے 40 گیگا واٹ یعنی 69 فیصد پچھلے ڈھائی برسوں میں منگوائے گئے۔ اس کے نتیجے میں پاکستان نیدرلینڈز کے بعد دوسری بڑی واحد ملکی درآمدی منڈی بن گیا ہے۔ ان میں سے بیشتر نجی اور غیر رجسٹرڈ تنصیبات ہیں جن کی بجلی زیادہ تر عوامی گرڈ کے بجائے خود استعمال ہو رہی ہے۔