اختلافِ رائے کے باوجود نیپرا نے صنعت اور زراعت کے لیے فی یونٹ 25.30 روپے کا نظرثانی شدہ اضافی بجلی ٹیرف جاری کر دیا

نیپرا نے اہل صنعتی اور زرعی صارفین کے لیے اضافی بجلی کی شرح 22.98 روپے سے بڑھا کر 25.30 روپے فی یونٹ مقرر کردی ہے۔ پرافٹ بائی پاکستان ٹوڈے کے مطابق، ریگولیٹر کے 6 نومبر کے فیصلے کے بعد جمعرات کو گزٹ میں نوٹیفکیشن جاری کرکے نظرثانی شدہ پیکیج نافذ کیا گیا۔

اس پیکیج کے تحت کے الیکٹرک اور دیگر بجلی تقسیم کار کمپنیوں کے اہل صارفین کو معمول کی کھپت سے زیادہ استعمال ہونے والی بجلی کم شرح پر ملے گی۔ نیپرا کے 4 ارکان میں سے 2 نے فیصلے سے اختلاف کیا، جبکہ چیئرمین وسیم مختار نے اضافی نوٹ جاری کرکے اپنا فیصلہ کن ووٹ استعمال کیا۔ صنعت کاروں نے نرخ میں اضافے پر اعتراض کیا اور کہا کہ پیکیج کی قیمت اور نیپرا کی بتائی گئی 31.83 اور 29.65 روپے فی یونٹ کی اضافی بجلی فراہم کرنے کی لاگت کا فرق دیگر صارفین کے بلوں میں ایندھن لاگت کی ایڈجسٹمنٹ کے ذریعے منتقل ہوسکتا ہے۔ ان کا یہ بھی کہنا ہے کہ پہلے پیکیج کے تحت مالی اثر صرف اس سے فائدہ اٹھانے والوں تک محدود رہنا تھا۔