پام آئل میں مسلسل دوسرے ہفتے بھی کمی، 12 ہفتوں کی کم ترین اختتامی سطح پر

بزنس ریکارڈر کے مطابق ملائیشیا کے پام آئل فیوچرز جمعہ کو مسلسل دوسرے ہفتے گراوٹ کا شکار رہے، اور دسمبر کا کنٹریکٹ 12 ہفتوں کی کم ترین کلوزنگ پر آ گیا۔ برسا ملیشیا ڈیریویٹوز ایکسچینج پر بنچ مارک کنٹریکٹ 21 رنگٹ یعنی 0.46 فیصد کم ہو کر 4,533 رنگٹ فی میٹرک ٹن پر بند ہوا۔ قیمتیں مسلسل چھٹے سیشن میں گریں اور ہفتے کے دوران مجموعی کمی 2.98 فیصد رہی۔

کوالالمپور میں مقیم ایک ٹریڈر نے کمزور برآمدات، ستمبر میں بڑھی ہوئی پیداوار اور 3 ملین ٹن سے اوپر جانے والے اسٹاک کو اس دباؤ کی وجہ قرار دیا۔ کارگو سرویئرز انٹرٹیک ٹیسٹنگ سروسز اور ایم سپیک ایگری ملیشیا کے مطابق ستمبر میں ملائیشیائی پام آئل مصنوعات کی برآمدات اگست کے مقابلے میں 17.1 اور 28.8 فیصد کے درمیان کم رہیں۔ شکاگو میں سویا آئل کی قیمتوں میں معمولی تبدیلی آئی جبکہ ڈالیان ایکسچینج ایک سرکاری تعطیل کی وجہ سے بند رہا۔

انڈونیشیا کی پام آئل برآمدات جنوری سے اگست کے دوران، خام اور ریفائنڈ دونوں اقسام ملا کر، 16.13 ملین ٹن تک پہنچیں۔ شماریات کے ادارے کے ڈیٹا کے مطابق یہ حجم گزشتہ سال کی اسی مدت سے 0.39 فیصد کم رہا۔