’بیرونی تجارت ایک بار پھر خطرے کا اشارہ دے رہی ہے‘

بزنس ریکارڈر کے مطابق پاکستان کی بیرونی تجارت ایک بار پھر خطرے کی گھنٹی بجا رہی ہے، جہاں برآمدات کی نمو سست پڑ رہی ہے جبکہ درآمدات تیزی سے بڑھ رہی ہیں۔ معاشی اور مالیاتی تجزیہ کار عتیق الرحمان کے مطابق برآمدات اور درآمدات کے درمیان بڑھتا ہوا فرق تجارتی توازن پر دباؤ بڑھا رہا ہے اور تجارتی خسارے کو مزید وسیع کر رہا ہے۔

ان کے مطابق برآمد کنندگان کو پیداواری لاگت میں اضافے کا سامنا ہے، جن میں مہنگی بجلی اور گیس، فیول کی بلند قیمتیں، مہنگا قرض، بھاری ٹیکس، ریفنڈ میں تاخیر اور مہنگا درآمدی خام مال شامل ہیں۔ ساتھ ہی ترسیل کے اخراجات بڑھ رہے ہیں، جہاز میں جگہ کی شدید کمی ہے، کارگو کی آمد و رفت متاثر ہے اور ٹرانسپورٹرز کی ہڑتالوں سے برآمد کنندگان کو بھاری نقصان ہوا ہے۔

ان کا کہنا ہے کہ ٹرک ڈرائیوروں کی ہڑتال یا کارگو کی آمد و رفت میں کسی بھی رکاوٹ سے ترسیل میں تاخیر ہو سکتی ہے، برآمد کنندگان پر جرمانے اور ہرجانے کے دعوے عائد ہو سکتے ہیں اور فیکٹریوں کی پیداوار متاثر ہو سکتی ہے۔ موجودہ اعداد و شمار کے مطابق اشیا اور خدمات کی برآمدات تقریباً USD38/40 ارب ڈالر ہیں، جو جی ڈی پی کا تقریباً 8 فیصد ہے، جبکہ دو سال میں USD100 ارب ڈالر تک پہنچنے کے لیے سالانہ 40 فیصد برآمدی نمو درکار ہوگی۔ ان کے خیال میں برآمدی کارگو کو رکاوٹوں کے دوران بھی آسانی سے چلنے دینا چاہیے۔