ایران جنگ کی کشیدگی کم ہونے کی امید پر تیل کی قیمتیں تقریباً چھ ماہ کی بلند ترین سطح سے نیچے آگئیں

سفارتی کوششوں سے امریکا اور ایران کے درمیان کشیدگی کم ہونے کی امید پیدا ہوئی، جس کے بعد پیر کو خام تیل کے نرخ گزشتہ ہفتے کی تقریباً 6 ماہ کی بلند سطح سے نیچے آگئے۔ 0426 جی ایم ٹی تک ڈبلیو ٹی آئی کی قیمت 2.16 فیصد کمی کے بعد 101.04 ڈالر فی بیرل رہی، جبکہ برینٹ 1.89 فیصد گر کر 114.51 ڈالر فی بیرل پر آگیا۔

بزنس ریکارڈر کے مطابق سعودی عرب میں حملوں کے بعد رسد سے متعلق خدشات بڑھے تھے، اور گزشتہ ہفتے برینٹ 6 فیصد جبکہ ڈبلیو ٹی آئی 2.3 فیصد مہنگا ہوا۔ اتوار کو قطری ثالث تہران پہنچے، تاہم حوثیوں کے ہوائی اڈے اور تیل تنصیبات پر حملے کے دعوے اور سعودی عرب کی جانب سے میزائل اور ڈرون روکنے کی اطلاعات نے خدشات برقرار رکھے۔

رپورٹ کے مطابق آبنائے ہرمز اور باب المندب سے تجارتی جہاز رانی میں رکاوٹیں کمپنیوں کو متاثر کر رہی ہیں۔ سعودی آرامکو 2027 کے دوسرے نصف سے سنگاپور میں خام تیل ذخیرہ کرنے کا منصوبہ رکھتی ہے، جبکہ عالمی توانائی ایجنسی کے سربراہ نے کہا کہ 2027 میں توانائی کی منڈیاں جنگ سے پہلے کی سطح پر واپس آنے کی توقع نہیں۔